بخاف م الهوى
أمبرة شقير
====
بخاف عليك م الهوى وبخاف من الأيام
لو مسّ رمشك وجع عمر عيونى ما تنام
يا حبيبى قلبى اتوجع آه من دنيا الغرام
وخدانا مسهرانا مليان قلبى بكلام
لو قولته او كتبته صدقنى مش هتنام
&&
بيقولوا انى شاعرة وأميرة القلوب
عشان بكتب أغانى للعاشقين يادوب
ميعرفوش انى من نظرتك بدوب
وانى من كتر حبك عن اى كلام بتوب
منا اصلى حاسه بقلبك عاشق ومغلوب
يا حبيبى هاتلى قلبك اقول ليه ع المكتوب
انى من يوم ماشوفتك مش لاقيه فيك عيوب
&&
يا مرايتى حسى بيا
ومتخبيش عليا
الحب جميل يا مرايتى
وأنا بنت ومش بأيديا
حبيته اوى يا مرايتى
ومتلوميش عليا
&&
يا كل حبيب تعالا عندى ليك كلمتين
الحب مش كلام على غمزه ونظرتين
الحب حياه جميله وهمسه بين اتنين
وقلب صادق دايماً وعهد بين حبيبين
ورباط قوى وقوة تمحى الخوف والأنين
ونغم شارد فى دنيا تحيى القلب الحزين
وسحر مالوش حدود وقبله على الخدين
ودمعه لو يغيب حبيب ثانيه تكون سنين
ولمسه من ايدين تمحى دموع العين
وحلم وردى يفتّح كل زهور البساتين
وقلب نبضه دايماً يرقص مابين ايدين
حبيب يقول لحبيبته انتى كنتى فين ؟
تعالى شوفى صورتك فى قلبى والشرايين
&&
وعمر بيجرى فى لحظه تتلخص فى كلمتين
( أنا بحبك ) وهحافظ عليك يا نور العين
ومش هسيب الدمعه تسكن فيك ثانيتين
عرفت يا حبيبى أميرتك تبقى مين !!
بحبـــــــك نفسى تكون منقوشه بالياسمين
فى قلبك تبقى ذكرى تفوح للعاشقين
مافيهاش ولا دمعه واحده و مليانه بالحنين
&&
بحبك يا حبيبى ووصف حبك زى الطفل الجنين
بيتربى ويتكوّن ويخرج للنور والبسمه ع الخدين
لما نشوفه بنفرح ونكبّر من السعاده ونتمنى يعيش سنين
حبك زى الفراشه الوانها كتير جميله بتسحر الناظرين
حبك ورد بعطوره بيجذب القلوب ويعشقه الملايين
حبك دنيا جميله وحضن دافى جداً واخدنى مش عارفه لفين
!
حبك اجمل هديه غمضت عيونى عليه عرفت انت مين
&&
انت الحب اللى خدنى وخطفنى طول الأوقات
لو ميت مليون بحبك هقولها من سكات
وقلبى بيصرخ بيها وتعلى كل الآهات
عشان حبك خطفنى وده شىء م المعجزات
أنا كنت قافله قلبى عن الحب بالذات
كنت خايفه عليه ينجرح وتنزل الدمعات
لاقيت قلبك حنيّن بيخاف عليا ويدعيلى ف الصلوات
&&
حبيبى مهما حكيت عن حبك والغرام
لو لآخر حياتى مش هيخلص الكلام
حبنا أجمل دنيا فيها حمام السلام
بيرفرف بجنحاته يمنع رمشى ينام
الله على حبك انت بيزيد مع الأيام
&&
اسمع لنبض قلبى هتحس بجنون
حبك دا كل ذنبى حبك هو السكون
انا من غيرك ياروحى اكون او لا اكون
بتوه لو غيبت عنى ترجع بيحلى الكون
لو غيبت عنك لحظه بتسهر العيون
ترجع تقول اميرتى يرقص قلبى بفنون
يخرج كلامى منّى من اجمل ما يكون
ودا كله عشان بحبك وانت فى حبى مجنون
بعشق نظرة عيونك ومن غيرها لا اكون
أميرة شقير
0 التعليقات :
إرسال تعليق