&& يــا دنيـــا كفـــايه && بقلم الشاعرة الراقية : أميرة شقير -- تحيات جدو عبدو

&& يــا دنيـــا كفـــايه &&
***********************
يا دنيا كفايه ارجوكى
وحبـى اللـى حبـوكـى
حرام القسـوه دى يا دنيا
فيه ناس بتركـب الموجه 
وناس فى الغربه لعنوكى
&&
يا دنيا مكشره وشك
فكى معانا التكشيره
اكلنا عيشك ومشك
وفى الزحمه فرمتينا
&&
فى ناس فى قصورك العاليه
وناس متهانه مش غاليه
وناس هتموت وتبتسمى 
وانتى كارهه ضحكتها
&&
يا دنيا سنين رفضانا
وكلمه هقولها بأمانه
ليه الفقير عليه تدوسى ؟
ورافعه الناس الخوانه !!
&&
ليه الخاين معاه تمشى ؟
وقافله علينا وتغشى !!
سجين فيكى بين الجدران
يوماتى تسودى وشى
&&
مابين الخلق أنا محتار
سجنتى بين ضلوعى النار
وكل ما اخرج ليكى
تلفى حواليا الأسوار
&&
ليه يا دنيا جايه اوى عليا ؟
وبتعشقى دمع عينيا
دنا طيب ومن يومى
جنب الحيط ماشى فيكى 
&&
أنا مسجون فى زنزانه 
من اللقمه حرمتينى
وللضحكه كسرتينى
وكل يوم تخونينى
&&
يا دنيا انتى يا خوانا
تعالى مره ويايا
أنا لربى شاكر فضله
وانتى معانده ليه معايا ؟
&&
احط ايدى على خدى 
الاقى الدمعه حراقه
هو انتى هتاكلى من جلدى ؟َ!!
ولا لدموعى مشتاقه !!
&&
أنام الليل وانا بفكر
وشايفه عذابى جواكى
قوليلى امتى هتحنى ؟
وايه آخرتها وياكى ؟
&&
خلاص يا دنيا راح اسيبك 
تلفى بيا وتدورى
وهستنى قضاء ربى
واقول امتى هيجى دورى 
&&
يارب الكون محتاجلك
شكيتلك همى بدموعى
يارب أنا اليتيم عبدك
قلبى بكى بين ضلوعى
يارب ارحم دموع عينى
 يارب الدنيا وجعتنى
ومين غيرك يشيل همى 
يـــــارب

أميرة  شقير

&& اللهـــــــــــم خفف الكـــــرب عن عبــــــادك &&