ثورة يناير = شاعر الروح. على الحامدي -- تحياتي جدو عبدو

ثورة يناير

دي لا حكاية ثورة ولا حتى لمه في ميدان 
دي حكاية شعب ثائر على الظلم والطغيان 
شعب شيوخة قبل شبابه بناته وستاته باتت في الميدان 
ضحي براحته وروحه علشان يعيش الاهل في أمان
ومصر تبقى قوية رأسها مرفوعه وصوتها يعلا يبان
والآن بقى فيه شلة كبيرة كل همها تهدم وتسرق الميدان
بتنادي وتقول يلا يا ناس يلا يا خلق على الميدان
يلا يا شباب انتوا وقود الثورة انتوا الفرسان
عايزين يسرقوا نجاحنا ويسرقوا حلمنا في الأمان
دا لا عاش ولا كان يا مصر إلى يهد فيكي ودلوقتي أهو بان
هنكون درع صد ورد لأي حد يفكر فيكي بالهد ويكون جبان
زي ما ضحينا بدمنا في ثورة يناير هنضحي دلوقتي في يناير الأمان
ونحمل وردة في ايدنا لكل جندي كان فارس وحارس لمتنا في الميدان
ولا نسمح لجبان تاني يحرق ويسرق ويقتل الشبان
دول خونه ولصوص ميادين وعايشين على سقط الميدان
كفاية هدم وهد وزعزعة. وخلوا العمل هو اللسان
ينطق يقول أنا ببني انا بزرع انا بصنع انا دلوقتي في أمان
انا المصري انا الهرم. انا قادر احمي بلادي فى كل اذان
انا خلاص بنيت وزرعت لاولادي كرامة وعزة وامان
في كل حارة وشارع ودرب وكل ميدان
خلاص كفاية خلو ثورة يناير تبقى حاجة
ونذكرها لاولادنا قبل ما نموت بكل افتخار
نقولهم احنا دلوقتي بنحصد شقانا
ودمنا إلى سال والكل ضربله تعظيم سلام
حط ايدك يابني في ايد ابن عمك واخوك
وقول إحنا في أمان وامتلكنا القوت
دا ثورة يناير حكاية كرامة مش لمه في ميدان
مش ثورة عشان نهدم مصر وتصبح خرابه

شاعر الروح. على الحامدي