بشاير الخير = ...بقلم الشاعر الراقي .. محمد ابو الفتح -- تحياتي جدو عبدو

بشاير الخير

..... محمد ابو الفتح

 شميت روايح جاية من السما

 وشوفت الأرض ملونة

فرح وضي سألت ياناس ايه الخبر

قالوا اصحى رمضان خلاص زمانه جاي

 رفعت إيدي أحمد ربنا

ونزلـت أهني كل الصحاب

 من أهالي الحي

 ده رمضان ده شهر الخير والكرامة

 وماله بين كل شهور السـنه

 زي القلوب بقت دافية 

وشوش بقت صافية

 كأنـها زرعة واتـروت بالمي

 رمضان شهر الصفا

 ونفوس مصفصفة

وكل واحد بيقول سماح ياخي

 عيال وفرحة و فانوس بشمعه والعة

 نازلين على الكنافة وعجينها ني

 كنافة وقطايف وحب ولطايف

 ولقــمة هنية وسهرة دينية

وزردة شاي ومسحراتي

 في كل شارع و حارة داير ليــلاتي

 واخــدها رايح وجاي

 سحور يشبع وقرأن للذنب بيشفع

وأذان يأذن الله أكبر الله أكبر الله

حي لقمة وخفيفة ونفوس نضيفة

 نــاكل والكل يجري على المساجد جري

 أيام وسمحة وليالي شرحة

وقلوب بتنده رمضان خــليك معــانا شوي

وأيامه تجري ماتقولش مجري

 وزمــان وطايــح بيطوي الليــالي طي

 بعده بيهل عيد والكل فرحان لابس جديد

 بيرمي الذنوب من سجله رمي