(( الصول حسين )) فارس الليل الحزين محمد عطيه محمد -- تحياتي جدو عبدو

رباعبات الأحزان (( الصول حسين ))

( للحزن في قلبي مكان ) 

كنت وحدي ماشي مرة .. . .. وأفتكرت سنين زمان

كل لحظة حلوة مرت .. . .. كل قسوة من الزمان

أفتكرت حاجات كتير .. . .. ذكرى ماضي من سنين 

حاجات تضحك حاجات تبكي .. . .. وقلبي دق من الحنين

حاجات تخلى القلب .. . .. من اللهفه اسير

....... أفتكرت ....... أيوه أفتكرت .......

قصة أول حب كان .. . .. أسمهان بنت الجيران

ولا لعبي في الحواري .. . .. ولا لعبي في الميدان

الشوارع هي هي .. . .. والبيوت هي البيوت

نفس مدرستي القديمة .. . .. والسنين بتفوت حزينة

وأتلقيت في عنيا دمعي .. . .. كل ذكره بالف آه

....... أفتكرت ....... أيوه أفتكرت .......

أفتكرت عم جرجس .. . .. عم حمزه وإسماعيل

لما كان اللبس ضيق .. . .. لما كان شعري طويل

أفتكرت سنين مراهقة .. . .. كنت أعاكس في البنات 

والعيون بتلاغي بعض .. . .. والكلام سكر نبات

....... أفتكرت ....... أيوه أفتكرت .......

أفتكرت القهوة لما .. . .. كنا نقعد بالساعات

هاتلي شيشه وجبلي طوله .. . .. كله كان صمت وسكات

لما كان الأهلي يلعب .. . .. كنا نعلي بالآهات

ولا مصر في البطوله .. . .. كات بتعلي الصفارات

....... أفتكرت ....... أيوه أفتكرت .......

أفتكرت أبويا وأمي .. . .. وأحلى أيام السنين

لما كان أبويا ييجي .. . .. والعرق يملي الجبين

وألقى أمي جايه تجري .. . .. بابتسامة الحنين

راح زمان الصدق ولا .. . .. فين زمان الطيبين

....... أفتكرت ....... أيوه أفتكرت .......

أفتكرت الجيش بتاعي .. . .. وأفتكرت الصول حسين

قولت لازم أروح أزوره .. . .. وأبقى أصلي في الحسين

رحت جري عند بيته .. . .. بس كان الوقت فات

رحت لكن ما لقيته .. . .. أبنه قالي أبويا مات

جرح قلبي كان كبير .. . .. والدموع سكنت عنيا

ألف رحمة ونور عليه .. . .. بكره جاي الدور عليا

....... أفتكرت ....... أيوه أفتكرت .......

....... ياريتني ....... كنت مافتكرت .......

كلمات الصدق

فارس الليل الحزين

محمد عطيه محمد

18 / 2 / 2 015