سيادة النائب
انت يا سيادة النائب
ازاي بقيت نائب
بفلوسك ولا بإرادة ناخب
بقيت نائب عننا
سواء برضانا او غصب عننا
لازم تشتغل ويهمك أمرنا
تشرع وتنادي بشرعنا
وان كنت فاكر اننا هنسيب حقنا
تبقى واهم وناسي نفسك ونسينا
وفي الحالتين هنخلعلك
ناسي نفسك هنخلعلك
ناسينا برده هنخلعلك
هنحط أيدينا كلنا ونبقي أغلبية
هنعدي النص وزيادة واحد فى الميه
وكدا يبقى حقنا أننا نخلعك ميه ميه
هنشرعلك احنا قانون
يخلعك يا جاهل بالأمور.
انت نجحت بكام صوت
الف اتنين. تلات آلاف صوت
أيا كان عدد إلى اداك صوت
هنجمعلك النص وزيادة يقولولك كفاية
هنخلعك يا كسول يلي للوطن متنفعش جسور
لا خدمت حد من الدايرة ولا إلى اداك صوت
لا عشت معانا احزانا ولا حتى جيت لافراحنا
لا عملت مشروع لشبابنا
ولا حتى رصيف ف طريقنا
ولا في الخير حاولت تجمعنا
يبقى ازاي هنديك تاني صوتنا
هو احنا كمان هنستني تترشح تاني
لا دا احنا قبل الأوان هنخلعك
وادي القانون احنا الشعب شرعناه
علشان برده بالقانون هنخلعلك
مهو برده احنا لازم نكون دولة قانون
قانون ينصف الضعيف ويحاسب إلى زيك
أن كنت خاين او حتى نايم على نفسك
مصر أمانة مايشرع لاهلها خاين الأمانة
نص القانون جاهز يا ريت تكون جاهز
وتكون قادر توصل صوت الغلابة
زي ما بقيت نائب بتنظيم القانون
برده هتغادر مكانك وبرده بالقانون
هتقدر تناقش قانون ممكن يخلعك
ولا هتعبد الكرسي وتبقى زي إلى قبلك
هنستني شويه عليك لأنه الدور جاي عليك
الحق نفسك وفوق. قبل الدور ما يصيبك
برلمان مصر مش تكية ولا حتى عزبة لابوك
آخر كلام ممكن يتقال والوقت قرب مفيش محال
شاعر الروح. على الحامدي
0 التعليقات :
إرسال تعليق