حكاية سفر----زجل الدكتور صبرى إسماعيل ----- تحياتى جدو عبدو

حكاية سفر----زجل الدكتور صبرى إسماعيل

*******
قطعت التذاكر ختمت الجواز
وسهران باودّع صحابى اللذاذ
وفى الصبح بدرى جمعت الشنط
باقلد جميع اللى سافر وفاز
*****
دخلت المطار وكلّى أمل
أطير للخليج واروح للعمل
والمّ البرايز والمّ الدولار
وحِلمى اللى كان, هناك يُكتمل
*******
وشُنطى اللى سارت على سير يلفّ
وتظهر فى شاشة بتكشف تشفّ
وندهوا الأسامى وقلبى يدق
وخفت المفاجأة يكون لى ملفّ
*****
وطرنا وطارت وفوق السحاب
أبصّ بغرابة وطيش الشباب
بهرنى المضيفة وعدد الكراسى
وكيف هى طارت وزى الغراب
******
نزلت فى جدة ولما طلعت
لقيت حر خالص بجلدى اتسلخت
وأبيض فى أبيض وناس زى بعض
ولهجة جديدة وكيفك سمعت
*****
سألت بشوقى منين الحرم
ورحته بتاكسى أطوف واستلم
وزمزم روانا بماء الشفاء
وكان التوسّل برب الكرم
******
ورحت الوظيفة بأمر الحبيب
مريضى بيسأل وقلبى يجيب
ومرة فى مرة حصل الإتلاف
وكنت بنشاطى إليهم قريب
*******
وصالح ينادى يقول ياولد
وانا الدم يجرى وعِرقى اتفرد
فاكرها شتيمة وبعدين فهمت
بأن البساطة فى بدو البلد
*******
رجعت لبلادى وخاطرى اتجبر
واحشنى البوادى وذكرى السفر
واحشنى السلايمة واحشنى الحروب
وطيبة المرينى وفخد الحجر
*****
وصارت محبة وصار الوصال
زيارة ومودة وألف اتصال
وذكرى جميلة يأمّة أصيلة
عليكم سلامى وكل الحلال