مأساة جنيه = ياسر شرف- كبير محررين مترجمين -- تحياتي جدو عبدو

مأساة جنيه
=======
ادعوا له بالصحة فى عنيه

عزيز ولقبه الحالى جنيه

بعافية يعنى جرى له ايه

دولار يهته ويقضى عليه

==

بالرغم أنه لسه شباب لكن

الكهولة فاتحة له حساب
فى عصر اسمه الملكية

كان له بطولة تاريخية

==
سموه بمدنة بحجم كبير

وخدوده حمرا وخيره كتير
لا كان يهته يورو ودينار

ولا عملة صعبة او حتى دولار

==
كان الملك وكمان فرعون

بصحة جامدة وأحسن عون
كان كنز واولاده دى قروش

وأحفاده ملاليم تملأ كروش

==
تجيب خروف او عجل كمان

ودوار مزخرف بالعمدان
وجوازة حلوة وفيها شوار

وخير ده داخل ليل ونهار

==
ومن ساعتها نازل فى حضيض

بسرعة خارقة وضعف يزيد
وبقدرة من خالق جبار

أصبح مريض وبفعل دولار

==
الكبد بنجر مع القولون

وشلل رباعى وعايز عون
ومناعته ضاعت اه يااولاد

ولا حتى عنتر او شداد

==
يمكن مضادات حيوية

او سم منقوع نقدية
يمكن ده أدمن مخدرات

بانجو وحشيش ومسكرات

==
وشرب شوية مية نيل

مع صرف صحى بشكل كبير
او جاله حتى فيروس سى

وفشل ده كلوى بفيروس بى

==
او وسوسة كده من الشيطان

مع نزلة جامدة او سرطان
مؤامرة كانت ولازالت

عشان تشيل هيبته كذلك

==
لكن لا أهلى ولا زمالك

يقدر يأثر فى الهالك
ادعوا له بالصحة يااحفاد

ويسترد قيمته مع الأمجاد

==
وربك عزيز قادر جبار

يهد يورو ويا دولار
سبب المشاكل والأخطار

ويارب دايما كده فى النار

==
كانوا زمان يقولوا له ياابيه

دلوقت خردة جرى لك ايه؟!
لو الزمان يرجع يا جنيه

ترجع ملك ده يا ابن الايه

==
لو صحة تبقى مع مالية

تقوى الحياة إلاقتصادية
ونجيب فراخ من الجمعية

بجنيه وكيلو ملوخية

==
الدعوة مطلوبة يااحباب

دليفرى يعنى لحد الباب
على كل عاتى او جبار

وعلى يورو برضه او حتى دولار.

===============

مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون