قصيدة الفلوس
=========
فلوس زمان كانت عصافير
بريش كتير وجناحها كسير
كانت بتمشى ولا بتطير
ببركة مدقوقة بمسامير
وكان شكلها يفرح وكبير
بمدنة حمرا وخيرها كتير
وببدلة سودا او فستان
وبعطر فواح من البستان
وصوتها نغمة بلحن عظيم
بتقول قصايد عينى ياليل
فلوس بتعكس شكل الجيل
بعادات عظيمة وحضارة النيل
وبالرغم من انها عصافير
فى الجيب تعشش ولا بتطير
ولو بتخرج تبكى كتير
بإخلاص وذمة بدون تبذير
وتتمنى ترجع وتبقى كتير
وتبيض وتفقس فى العصافير
بوفاء وحكمة نهر النيل
عشان جناحها مهيض وكسير
دلوقت تغيير فى العصافير
بتشيل فلوس وتطير فى اثير
جناها مفرود كده على طول
لاتراعى عشرة او اكلة فول
ولابسة كاجوال يعنى خروج
بلا عودة يعنى وده المطلوب
وتروح تهاجر بلا اسباب
وطيرانها من الباب والشباك
تخش جيبى وتصوصو
ولا كلبة رومى بتهوهو
بلحن بلدى وضيع ورقيع
وتخرم جيوبى بدون ترقيع
لا تراعى عشرة ولا تقاليد
ببلطجة وبشكل جديد
كانوا يقولوا زمان ملاليم
دلوقت بيقولوا بالملايين
ولابركة فيها ولا حتى جميل
والعقم فيها وباء وكبير
لابيض بيفقس وكمان بتطير
وجناحها بموتور سرعة ريح
بعد ما كان فى زمان ده جريح
وتعبنا بحث وجرى كتير
واللى يعانى كل فقير
الحل يبقى جناح ونطير
ونسابق الريح والعصافير .
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
0 التعليقات :
إرسال تعليق